MES DA CIENCIA EN GALEGO: VIDEOCONFERENCIA Dr. FRANCISCO DÍAZ - FIERROS : " AUGA PARA TODOS. A SECA QUE NON CESA".

 

(Tema eixo da biblioteca: Biblioteca líquida: A auga como tema vertebrador de actividades)

1º de Bacharelato no Mes da Ciencia en Galego 💧

Co motivo do Mes da Ciencia en Galego (novembro 2026) , o alumnado de 1º de Bacharelato, coa colaboración do departamento de Bioloxía,  participou na biblioteca nunha videoconferencia de Igaciencia.

O Dr. Francisco Díaz-Fierros Viqueira impartiu a charla "Auga para todos. A seca que non cesa", onde analizou o ciclo da auga, as secas históricas e actuais en Galicia, o impacto do cambio climático e a urxencia de facer un uso responsable dos recursos hídricos. 

Ao finalizar o relatorio, os estudantes puideron formular as súas preguntas en directo ao Doutor a través do canal de Igaciencia.

Podedes ver a videoconferencia completa na seguinte ligazón.

📖 Formación de novos usuarios e usuarias na Biblioteca!

 

Estas semanas recibimos ao alumnado de 1.º de ESO  nas nosas xornadas de formación de novos usuarios e usuarias da Bilioteca.

Durante a visita explicámoslles o funcionamento da biblioteca  e o noso tema eixo: «Biblioteca líquida: a auga». Exploraron as diferentes zonas da biblioteca: a central, o Parnasillo, terraza...

Descubriron como buscar libros interpretando as etiquetas cunha dinámica en grupos seguindo as pistas dunhas tarxetas, tendo que localizar entre os andeis os libros asignados.

Ademais, a formación incluiu a presentación da biblioteca dixital E-LBE.2, explicándolles o seu funcionamento e facendo entrega das contrasinais de acceso a cada alumno e alumna para que poidan acceder ás lecturas tamén dende a casa.

A verdade é que traballamos moito e pasámolo en grande! Agardamos vervos moi pronto e moi a miúdo entre os andeis da biblioteca. 🎒📚

BIBLIOSUXESTIÓNS: DÍA DE DEFUNTOS, DÍA DE TODOS OS SANTOS, SAMAÍN, HALLOWEEN...

 (ACTIVIDADE RELACIONADA COA PROMOCIÓN DA LECTURA E A BIBLIOTECA COMO LUGAR DE COÑECEMENTO)

Chegan as noites máis longas do ano e o momento perfecto para mergullarse nunha boa lectura. Preparamos unha selección especial de libros de terror, misterio e lendas galegas para levar en préstamo.

Botádelle unha ollada ás imaxes para descubrir as nosas propostas e pasade pola biblioteca a coller a vosa lectura!

ENTREGA DE PREMIOS: Concurso de relatos de terror baseados na auga.

 

(ACTIVIDADE RELACIONADA COA CREACIÓN LITERARIA E COA DIFUSIÓN DA CULTURA DESDE AS BIBLIOTECAS) 

Así foi a entrega de premios aos mellores contos de terror baseados na auga.

Noraboa aos premiados e un enorme agradecemento a quen participou por mergullarnos nas súas historias máis arrepiantes.

BIBLIOTECA CREATIVA: HALLOWEEN

 

(ACTIVIDADE RELACIONADA COA BIBLIOTECA CREATIVA E A BIBLIOTECA COMO LUGAR DE COÑECEMENTO)

O alumnado de 1º de Bacharelato, coa supervisión do Departamento de Inglés, preparou unha terrorífica exposición de libros e películas coa temática de Halloween amosando o seu dominio da lingua inglesa.

Non o perdas e achégate ao Parnasillo da Biblioteca!

Concurso de microrrelatos de terror baseados na auga.

 ACTIVIDADE RELACIONADA COA CREACIÓN LITERARIA  E COA DIFUSIÓN DA CULTURA DESDE AS BIBLIOTECAS

DÍA DAS ESCRITORAS: VISITA DE CYNTHIA MENÉNDEZ (19 de outubro)

Hoxe é o DÍA DAS ESCRITORAS!! Para celebralo, visitou a nosa @biblioxun Cynthia Menéndez, autora do premiado libro “Son coma glaciares os barcos de aceiro”. Conversou cos rapaces e rapazas de 4° de ESO e falounos sobre os puntos de vista na literatura, sobre cambiar o foco no relato habitual dos feitos, sobre novas miradas que enriquecen o mundo e os mundos da literatura… 

Durante moito tempo a mirada da muller faltou nos andeis das bibliotecas, hoxe tentamos que iso xa non sexa así… 

Foi un pracer escoitar a esta muller!! 

TEMA EIXO CURSO 2026-27. BIBLIOTECA LÍQUIDA: A AUGA COMO TEMA VERTEBRADOR DE ACTIVIDADES

 

A BIBLIOXÚN NA REVISTA XUNCOS Nº 33!!

Este ano recuperamos para o centro a REVISTA XUNCOS!! 

Grazas aos profes Joaquín e Xoán que se volveron embarcar neste proxecto tan imporante para a Xunqueira I. Non esquecemos a Ramos, que foi o pai da revista, pero agradecemos a estes profes tanto a recuperación como a renovación da mesma. 

O máis bonito é que que tamén aparecemos nós, a BIBLIOXÚN, nas páxinas centrais da revista: