ENTROIDO E NOVIDADES NA BIBLIOXÚN!

Preparámonos para o ENTROIDO que comeza, e no noso instituto xa conta con...

1) "Mesiñas cuquis" na Biblioxún coa temática do entroido.

2) Bibliosuxestións quentiñas a partir das novidades recén mercadas para vós. Xa sabedes: LEVADE PARA LER NAS VACACIÓNS!!

3) E a Festa de Entroido no pavillón!!!

"MESIÑAS CUQUIS" DE ENTROIDO!

AS NOVIDADES!!
Este ano sobre TEATRO!!
(Biblioteca Escolar a Escena!)

"Un mundo de árbores", tema eixo deste curso!!

FESTA DE ENTROIDO NO PAVILLÓN (Grupo de Seráns da Xunqueira)

TAMÉN HAI MOITA MAXIA NO ENTROIDO!

 

Madamas e galáns de Cobres

• O Entroido (do latín INTROITUS, 'introducción') é a festa ritual máis importante de Galicia. 

Boteiros de Viana do Bolo.

• Hai dúas grandes teorías para explicar a orixe do Entroido: a primeira xorde do cristianismo, como periodo de licenza antes dos rigores da Coresma; a segunda relaciona esta festa coas antigas mascaradas da invernía que tiñan lugar en Europa antes da chegada do cristianismo, que supoñían levar a cabo unha serie de ritos que permitía expulsar o inverno para que o sol voltara a coller forza e a terra botara os seus froitos. Por iso é unha festa esencialmente rural, e como o proceso de desruralización foi máis tarde en Ourense e en Lugo que nas zonas costeiras, por iso o Entroido tradicional ten alí aínda tanta forza. 

Mázcara de Manzaneda

• Os ritos propiciatorios da primavera, da rexeneración da terra, da fertilidade, vense no uso das fitas de cores de sombreiros, de traxes, o uso dos espellos, os traxes brancos... Son prendas que evocan a natureza, lembran as cores da primavera, o sol vivificador, a luz... Pensemos nas cores e os colares das madamas e os galáns de Cobres, dos Boteiros de Viana do Bolo, nos Vellaróns de Riós, dos volantes do entroido ribeirao; pensemos no branco dos troteiros de Sande ou dos vergalleiros de Sarreaus... Son tamén símbolos rexeneradores o mesmo feito de transformarse, a mestura de sexos, a animalidade: os peliqueiros de Laza, os cigarróns de Verín, as bonitas de Sande (que non son homes nin mulleres, son seres do Alén!), o oso de Salcedo, os galos de San Pedro da Mezquita, as pitas de Ourense... 

Cigarróns de Verín

• Os ritos esconxuradores do mal, das tebras da invernía, vense na presencia dos sons (de chocas, de bombos, de cornos, de campás... que anuncian o inicio do Entroido e expulsan o mal, aquelo que mantén a terra morta) e na presenza do lume, que tamén limpa, purifica, bota fóra o mal. Os fachós de Castro Caldelas, as rodas de lume, dos Ancares, o feito de botar a cinza sobre as terras... son exemplos de ritos ígneos que tamén teñen lugar no Entroido. 

Bonitas de Sande

• O Entroido constitúe, en definitiva, un RITO DE CATARSE: antes de empezar o novo ciclo da primavera ten que existir o CAOS, A TORMENTA, A TRANSGRESIÓN DA ORDE para dar paso á renovación. 

Vergalleiros de Sarreaus.

• O Entroido é, pois, algo máis que o meramente lúdico ou un momento no que fas o que che da a gana: nestas zonas ten un valor cultural, simbólico, serio e sagrado que nos retrotrae aos nosos ancestros e que é preciso COÑECER PARA CONSERVAR.

Galos de San Pedro da Mezquita

A fonte de toda esta información e moitísimos máis datos e simbolismos desta festa tan nosa é o antropólogo Rafael Quintía, do que aprendín un mundo nun curso que acabo de rematar hai uns días. 

E como o coñecemento hai que transmitilo, velaí o que extraín para que vós vexades que TAMÉN HAI MAXIA NO ENTROIDO!! E vaia se a hai!!! 

ENTROIDO MOOOI NATURAL!!!

Este ano algunhas profesoras do noso centro (María Jesús, Rosa, Carlota...) pensaron que a mellor temática para disfrazarse neste Entroido de 2020 sería a da NATUREZA!!

Deste modo, fixádevos como resultou este día 21, véspera das vacacións de Entroido:

O profesor de Educación Física, Alexandre! 

Un gnomo espectacular facendo préstamos na biblio!!!

Toda a rapazada bailando no Salón de Usos Múltiples!!

A nosa vicedirectora, María Jesús, vestida de xirafa!!!

Cebras, osos, ratos...

Un orangután moi moi artístico!!!

Ademais de animaliños, están os defensores da natureza e da contaminación!!!

Moito público con ganas de Entroido!!!

A profesora Rosa, de Matemáticas, invadida de natureza por todo o corpo!!!!

Un unicornio azul, escapado da canción, foi escoltar a conferencia literaria...

Extraños seres regueifando na biblioteca!!!

NOVIDADES NOS ESTANTES DA BIBLIO

Libros novos e outros que se adquiriron hai meses, pero que temos que chamar a atención sobre eles!

Fixádevos nos libros de narrativa e poesía galega, os cómics, as novelas ilustradas, novidades en literatura xuvenil, obras para traballar en clase coa mitoloxía, algún libro de ciencia, de todo!!!

Non deixamos de lado a temática de viaxes: fixádevos que a carón da mesa de xestión da biblio, podedes consultar e mesmo levar fermosísimos libros de fotografía e de tipo divulgativo moi interesantes!

O ENTROIDO XA ESTÁ AQUÍ!!! Mirade que monográfico editou Sermos Galiza!!!

DECORACIÓN DO ENTROIDO NA BIBLIOTECA.

Concuso de carteis do entroido