ROSALÍA XOGA NA XUNQUEIRA I!

• Coma todos os anos, temos un recunchiño para lembrar a ROSALÍA DE CASTRO na nosa biblioteca:

• Pero este ano, ademais, damos conta da seguinte actividade: 

Alumnado de 2º de ESO, da man da profesora de Galego, Raquel Martiz, confeccionou unha volta do popular pasapalabra, co adaxo do 184 aniversario de Rosalía de Castro, que se conmemora este 24 de febreiro. 

Para festexar a efeméride, que mellor que afondar un chisco na biografía da autora de Cantares Gallegos e Follas Novas xogando!

As catro clases de segundo apostamos por unha actividade lúdica e creamos unha rosca do pasapalabra, que permite enredar mentres adquirimos pequenos saberes sobre detalles da vida e obra da nosa meirande escritora. 

A este pracer de xogar, sumámoslle o de poder compartilo con todo o mundo na inmensidade da rede e velaquí o está: https://es.educaplay.com/recursos-educativos/8259346-a_roda_rosaliana.html

O sitio web da Fundación da poeta, https://rosalia.gal/, supuxo a principal ferramenta de traballo que usamos para extraer a información coa que elaboramos as vinte e tres preguntas para cadansúa letra do noso alfabeto. Agardamos que vos preste!

Con esta nosa proposta, respondemos, modestamente, ao chamamento que cada ano fan, tanto a devandita Fundación Rosalía de Castro, como a Asociación de Escritoras e Escritores en Lingua Galega (AELG) para conmemorar o Día de Rosalía de Castro.

Cantarte hei, Galicia,

na lengua gallega,

consolo dos males,

alivio das penas.

Cantares gallegos, 1863

Máis información sobre o Día de Rosalía picando nos seguintes enlaces:

https://rosalia.gal/que-facemos/axenda/dia-de-rosalia-2021/

https://www.aelg.gal/actividades/dia-de-rosalia-de-castro/2021/2/23/dia-de-rosalia-de-castro-2021

#rdc_2021 #TeusDocesCantares

Na bibloxun estamos encantados/as 

con esta marabillosa actividade de Galego!!! 

Que sexan moitas máis!!!

TAMÉN HAI MOITA MAXIA NO ENTROIDO!

 

Madamas e galáns de Cobres

• O Entroido (do latín INTROITUS, 'introducción') é a festa ritual máis importante de Galicia. 

Boteiros de Viana do Bolo.

• Hai dúas grandes teorías para explicar a orixe do Entroido: a primeira xorde do cristianismo, como periodo de licenza antes dos rigores da Coresma; a segunda relaciona esta festa coas antigas mascaradas da invernía que tiñan lugar en Europa antes da chegada do cristianismo, que supoñían levar a cabo unha serie de ritos que permitía expulsar o inverno para que o sol voltara a coller forza e a terra botara os seus froitos. Por iso é unha festa esencialmente rural, e como o proceso de desruralización foi máis tarde en Ourense e en Lugo que nas zonas costeiras, por iso o Entroido tradicional ten alí aínda tanta forza. 

Mázcara de Manzaneda

• Os ritos propiciatorios da primavera, da rexeneración da terra, da fertilidade, vense no uso das fitas de cores de sombreiros, de traxes, o uso dos espellos, os traxes brancos... Son prendas que evocan a natureza, lembran as cores da primavera, o sol vivificador, a luz... Pensemos nas cores e os colares das madamas e os galáns de Cobres, dos Boteiros de Viana do Bolo, nos Vellaróns de Riós, dos volantes do entroido ribeirao; pensemos no branco dos troteiros de Sande ou dos vergalleiros de Sarreaus... Son tamén símbolos rexeneradores o mesmo feito de transformarse, a mestura de sexos, a animalidade: os peliqueiros de Laza, os cigarróns de Verín, as bonitas de Sande (que non son homes nin mulleres, son seres do Alén!), o oso de Salcedo, os galos de San Pedro da Mezquita, as pitas de Ourense... 

Cigarróns de Verín

• Os ritos esconxuradores do mal, das tebras da invernía, vense na presencia dos sons (de chocas, de bombos, de cornos, de campás... que anuncian o inicio do Entroido e expulsan o mal, aquelo que mantén a terra morta) e na presenza do lume, que tamén limpa, purifica, bota fóra o mal. Os fachós de Castro Caldelas, as rodas de lume, dos Ancares, o feito de botar a cinza sobre as terras... son exemplos de ritos ígneos que tamén teñen lugar no Entroido. 

Bonitas de Sande

• O Entroido constitúe, en definitiva, un RITO DE CATARSE: antes de empezar o novo ciclo da primavera ten que existir o CAOS, A TORMENTA, A TRANSGRESIÓN DA ORDE para dar paso á renovación. 

Vergalleiros de Sarreaus.

• O Entroido é, pois, algo máis que o meramente lúdico ou un momento no que fas o que che da a gana: nestas zonas ten un valor cultural, simbólico, serio e sagrado que nos retrotrae aos nosos ancestros e que é preciso COÑECER PARA CONSERVAR.

Galos de San Pedro da Mezquita

A fonte de toda esta información e moitísimos máis datos e simbolismos desta festa tan nosa é o antropólogo Rafael Quintía, do que aprendín un mundo nun curso que acabo de rematar hai uns días. 

E como o coñecemento hai que transmitilo, velaí o que extraín para que vós vexades que TAMÉN HAI MAXIA NO ENTROIDO!! E vaia se a hai!!! 

DÍA DOS NAMORADOS (14 DE FEBREIRO)

O 14 de febreiro é o día dos namorados, 

e simplemente porque vos queremos

aquí vos deixamos recomendacións ben interesantes

para a nunca doada 

ARTE DE AMAR!!

Antes... unhas "Love Letters" no Parnasillo:

Mira o que fan as alumnas de 2º de Bach na clase de Inglés!!

 

DÍA INTERNACIONAL DA MULLER E DA NENA NA CIENCIA (11 DE FEBREIRO). LECTURAS COMPARTIDAS.

María, a profesora de Matemáticas, suxeríu ao seu alumnado da ESO que fixera unha aproximación ás mulleres matemáticas e científicas a través da lectura dalgúns datos interesantes das súas respectivas biografías. Este ano fixéronno nas aulas e non na biblioteca, pero xa sabemos que hai que adaptarse ata que volvan os tempos mellores!

A profesora María!!

ALUMADO DE 3º A: 

ALUMNADO DE 3º B: 

ALUMNADO DE 3º C:

ALUMNADO DE 3º D: